ខេត្តស្វាយរៀង ៖ ចម្ការអំពៅ ចំនួន៨០ហិកតារ ត្រូវអគ្គិភ័យឆាបឆេះ បណ្តាលឱ្យរងការខូចខាតស្ទើរទាំងស្រុង ដោយសង្ស័យមានជនខិលខូចលួចដុតបំផ្លាញ។
តាមសមត្ថកិច្ចនគបាលស្រុកស្វាយទាប បានឱ្យដឹងថា ករណីភ្លើងឆេះចម្ការអំពៅនេះ បានកើតឡើងកាលពីវេលាម៉ោងប្រមាណ១២ថ្ងៃត្រង់ ថ្ងៃទី១៤ ខែកុម្ភៈ ឆ្នាំ២០២១ ស្ថិតនៅភូមិអូរតាមោ ឃុំមនោរម្យ ស្រុកស្វាយទាប។
ចម្ការអំពៅដែលទទួលរងការឆាបឆេះខាងលើនេះ គឺជារបស់ក្រុមហ៊ុនលោកកុយ សារ៉េន មានលំនៅក្នុងភូមិពពែត ឃុំពពែត ស្រុកស្វាយទាប។
ប្រភពពីសមត្ថកិច្ច បានបញ្ជាក់ថា ក្រោយពីប្រជាពលរដ្ឋរាយការណ៍ថា មានភ្លើងឆេះចម្ការអំពៅភ្លាម សមត្ថកិច្ចបានដឹកនាំកម្លាំងទៅជួយអន្តរាគមន៍ពន្លត់ រយៈពេលជាង២ម៉ោង ទើបភ្លើងបានរលត់អស់វិញទាំងស្រុង នៅវេលាម៉ោងប្រមាណ ២និង៣០នាទីរសៀល ថ្ងៃដដែល ដោយភ្លើងឆេះមានទ្រង់ទ្រាយធំពេកមិនអាចគ្រប់គ្រង និងជួយពន្លត់បាន ម្យ៉ាងមេឃមានកម្តៅខ្លាំង និងមានខ្យល់បក់បោកផង ទើបឆេះរាលលឿនបែបនេះ។
ក្រោយការពិនិត្យស្ថានភាពរួច សមត្ថកិច្ចដាក់ការសង្ស័យថា ភ្លើងឆេះចម្ការអំពៅនេះ គឺមានជនខិលខូចលួចដុត។
ក្រោយកើតហេតុ កងកម្លាំងសមត្ថកិច្ចនគបាលស្រុកស្វាយទាប បានសហការជាមួយកម្លាំងនគរបាលវរការពារព្រំដែន ដំណាក់ព្រំដែនមនោរម្យ និងកងយោធពលខេមរភូមិន្ទ វរៈការពារព្រំដែនចុះអង្កេតស្រាវជ្រាវរកមុខសញ្ញា ដើម្បីចាប់មកផ្តន្ទាទោសតាមច្បាប់៕