មន្ត្រីបម្រើការងារងារសាធារនៈដែលបានយកជើងចង្អុលស្លាកលេខរថយន្ត ហើយត្រូវបានមហាជនរិះគន់មិនសំចៃមាត់នោះ នៅពេលនេះប្រធានមន្ទីរសាធារណៈការនិងដឹកជញ្ជូនខេត្តសៀមរាប ផ្លាស់ប្តូរមុខងារហើយ។
នៅក្នុងគណនីហ្វេសប៊ុករបស់ក្រសួងសាធារណៈការនិងដឹកជញ្ជូន បានបង្ហោះសារថា “ផ្ទេរភារកិច្ចមន្ត្រីឈ្មោះ “ស៊ីម សុផាត” ចេញពីមុខងារជា “មន្ត្រីផ្តល់សេវាសាធារណៈផ្ទាល់” ទៅជា “មន្ត្រីរដ្ឋបាលទូទៅ“ ដោយសារតែមន្ត្រីរូបនេះបានប្រព្រឹត្តិ នូវកំហុសឆ្គង តាមរយៈការប្រេីប្រាស់ អាកប្បកិរិយា មិនសមរម្យ ក្នុងពេលផ្តល់សេវា ជូនប្រជាពលរដ្ឋ”។
ទំព័រហ្វេសប៊ុកដដែល បានបន្តថា “ប្រសិនបេីបងប្អូនប្រជាពលរដ្ឋ ជួបប្រទះនឹងការផ្តល់សេវាសាធារណៈ ក្នុងវិស័យសាធារណការ និងដឹកជញ្ជូន ក្រោមអាកប្បកិរិយាមិនសមរម្យ របស់មន្ត្រីយេីងខ្ញុំនោះ សូមមេត្តារាយការណ៍ដោយភ្ជាប់ជាមួយ នឹងឈ្មោះមន្ត្រី អត្តលេខ ពេលវេលាកេីតហេតុ ទីតាំងផ្តល់សេវា រូបភាព វីដេអូ និងភស្តុតាងផ្សេងៗ ដេីម្បីយេីងខ្ញុំពិនិត្យ ចាត់វិធានការតាមនីតិវិធី។ សូមអរគុណ!”។
ដោយឡែកក្នុងលិខិតបង្គាប់ការរបស់មន្ទីរសាធារណៈការនិងដឹកជញ្ជូនខេត្តសៀមរាប បានសម្រេច៖
ប្រការ១៖ ផ្ទេរភារកិច្ចលោកស្រីសុឹម សុផាត ពីអនុប្រធានអង្គភាពចុះបញ្ជី និងផ្តល់បណ្ណបើកបរយានយន្ត ឲ្យមកបម្រើការងារនៅការិយាល័យកិច្ចការទូទៅនៃមន្ទីរសាធារណៈការនិងដឹកជញ្ជូនខេត្តសៀមរាប។
ប្រការ២៖ សាមីខ្លួនត្រូវមកបង្ហាញខ្លួននៅការិយាល័យកិច្ចការទូទៅ នៅរៀងរាល់ម៉ោងធ្វើការ។
ប្រការ៣៖ ការិយាល័យកិច្ចការទូទៅ អង្គភាពចុះបញ្ជី និងផ្តល់បណ្ណបើកបរយានយន្ត និងសាមីខ្លួន ត្រូវសហការអនុវត្តសចក្តីសម្រេចនេះឲ្យមានប្រសិទ្ធភាពខ្ពស់៕