ភ្នំពេញ ៖ យុវជនម្នាក់បានស្គាល់និងស្រលាញ់ក្មេងស្រីម្នាក់មិនទាន់គ្រប់អាយុ រហូតនាំគ្នាទៅរួមរ័កក្នុងបន្ទប់ជួល លុះរឿងរ៉ាវនេះបែកធ្លាយដល់ឪពុកម្តាយក្មេងស្រី ក៏បានទៅដាក់ពាក្យបណ្តឹងចាប់ខ្លួនជនសង្ស័យមកផ្តន្ទាទោសតាមច្បាប់។
ហេតុការណ៍ឃាត់ខ្លួនជនសង្ស័យខាងលើនេះធ្វើឡើងកាលពីល្ងាចថ្ងៃទី៥ ខែសីហា ឆ្នាំ២០១៩ នៅនៅចំណុចផ្ទះជួលរបស់ជនសង្ស័យ ស្ថិតក្នុងភូមិត្រពាំងថ្លឹង៣ សង្កាត់ចោមចៅ១ ខណ្ឌពោធិ៍សែនជ័យ។
ជនសង្ស័យមានឈ្មោះឆេង ម៉ុក ភេទប្រុស អាយុ២១ឆ្នាំ មុខរបរកម្មកររោងចក្រ ស្នាក់នៅផ្ទះជួលនៅភូមិត្រពាំងថ្លឹង៣ សង្កាត់ចោមចៅ១ ខណ្ឌពោធិ៍សែនជ័យ មានស្រុកកំណើត ស្រុកអង្គស្នួល ខេត្តកណ្តាល។ ចំណែកក្មេងស្រីរងគ្រោះឈ្មោះ ធ គ ល អាយុទើប១៣ឆ្នាំ ជាអនីតិជន មានទីលំនៅ ស្រុកអង្គស្នួល ខេត្តកណ្តាល។
សមត្ថកិច្ចបានឲ្យដឹងថា យោងតាមបណ្តឹងរបស់ភាគីក្មេងស្រីរងគ្រោះ បានឲ្យដឹងថា ជនសង្ស័យបានទំនាក់ទំនងនិងស្រលាញ់គ្នាជាមួយក្មេងស្រីរងគ្រោះ១ឆ្នាំមកហើយ តែស្រលាញ់ចិត្តនិងចិត្តប៉ុណ្ណោះ។ លុះដល់ថ្ងៃទី១៩ ខែកក្កដា ឆ្នាំ២០១៩ ជនសង្ស័យបានល្បួងក្មេងស្រីរងគ្រោះមកនិយាយលេងគ្នានៅក្នុងបន្ទប់ជួលរបស់គេស្ថិតនៅភូមិទួលពង្រ សង្កាត់ចោមចៅ១ រហូតឈានដល់ការរួមភេទជាមួយគ្នាបានម្តង។
ប្រភពបានបន្តថា បន្ទាប់មកនៅថ្ងៃទី២០ ខែកក្កដា ឆ្នាំ២០១៩ ជនសង្ស័យនិងក្មេងស្រីរងគ្រោះបានរួមភេទជាមួយគ្នាបានម្តងទៀត ទើបបែកគ្នាទៅផ្ទះរៀងខ្លួន។
សមត្ថកិច្ចបានបញ្ជាក់ថា ក្រោយពេលកូនស្រីត្រឡប់មកផ្ទះវិញ ឪពុកម្ដាយបានសួរនាំរហូតបែកធ្លាយរឿងគ្មានសល់ ក៏បាននាំគ្នាទៅដាក់ពាក្យបណ្តឹងនៅស្រុកអង្គស្នួល ពោលគឺមិនបានដាក់ពាក្យបណ្តឹងនៅ កន្លែងកើតហេតុឡើយ។ ហើយឪពុកម្តាយក្មេងស្រីរងគ្រោះបានប្រើល្បិចលួយលោមជនសង្ស័យចេញមកនិយាយគ្នា លុះនៅល្ងាចថ្ងៃទី០៥ ខែសីហា ជនសង្ស័យបានត្រឡប់មកផ្ទះជួលវិញ ទើបក្រុមគ្រួសារចាប់ខ្លួនប្រគល់ឲ្យសមត្ថកិច្ចប៉ុស្តិ៍ចោមចៅ១ តែម្តង។
នៅចំពោះមុខសមត្ថកិច្ច ជនសង្ស័យបានសារភាពថា រូបគេបានស្រឡាញ់គ្នាជាមួយក្មេងស្រីអស់រយៈពេល១ឆ្នាំមកហើយទើបតែនៅថ្ងៃទី១៩ ខែកក្កដា ឆ្នាំ២០១៩កន្លងមកនេះ រូបគេបានបបួលក្មេងស្រីរងគ្រោះមកនិយាយគ្នាលេងដល់យប់ទើបនាំគ្នាទៅដេកក្នុងបន្ទប់ជួលអ្នកស្គាល់គ្នាក្នុងភូមិទួលពង្រសង្កាត់ចោមចៅ១ គ្រាដែលម្ចាស់បន្ទប់មិននៅ រួចបានសុំរួមរ័កបានសម្រេចម្តងលុះនៅថ្ងៃទី២០ រូបគេបានរួច័កជាមួយគ្នាបានសម្រេចម្តងទៀត។ ស្រាប់តែល្ងាចថ្ងៃទី០៥ខែសីហាឪពុកម្ដាយខាងស្រីប្តឹងប៉ូលិសចាប់ខ្លួនតែម្តង។
បច្ចុប្បន្នជនសង្ស័យត្រូវបានសមត្ថកិច្ចសួរនាំ និងកសាងសំណុំរឿងបញ្ជូនទៅកាន់ផ្នែកជំនាញបន្តនីតិវិធី៕