ខេត្តឧត្ដរមានជ័យ ៖ វីរកងទ័ពម្នាក់ ឈរជើងការពារទឹកដីនៅសមរភូមិមុខ ថ្មដូន បើកប្រាក់ខែ បានជាង ១លានរៀល ដាក់ក្នុងហៅប៉ៅខោ យកទៅឲ្យប្រពន្ធ ទុកចំណាយក្នុងគ្រួសារ ទិញទឹកដោះគោឲ្យកូនបៅ ស្រាប់តែមិនទាន់បានឲ្យប្រពន្ធផង ក៏ជ្រុះបាត់អស់ ធ្វើឲ្យគ្មានលុយឲ្យប្រពន្ធទិញទឹកដោះគោឲ្យកូនបៅ ។
វីរកងទ័ពដែលជ្រុះបាត់លុយប្រាក់ខែ អត់លុយទិញទឹកដោះគោឲ្យកូនបៅនោះ មានឈ្មោះសេង ខានីន អាយុ២៨ឆ្នាំ អត្តលេខ ២៣៥៨២២ ប្រចាំការនៅជួរមុខ ទិសថ្មដូន ជិតប្រាសាទតាក្របី និងប្រាសាទតាមាន់ ខេត្តឧត្ដរមានជ័យ ។ មានប្រពន្ធឈ្មោះឌឿង សៅរី អាយុ២០ឆ្នាំ មុខរបរនៅផ្ទះ រស់នៅភូមិពោធិ៍ថ្មី ឃុំបេង ស្រុកបន្ទាយអម្ពិល ខេត្តឧត្ដរមានជ័យ ។ ក្រោយរៀបការជាង២ឆ្នាំ ទទួលបានចំណងដៃ កូនស្រី២នាក់ កូនស្រីទី១ អាយុជាង២ឆ្នាំ និងកូនស្រីទី២ អាយុ៦ខែ នៅបៅទឹកដោះគោ ទាំង២នាក់ ។
ក្នុងបទសម្ភាសន៍ជាមួយ “នគរធំ” នៅល្ងាចថ្ងៃទី២៨ ខែសីហា ឆ្នាំ២០២៥ វីរកងទ័ពសេង ខានីន បានឲ្យដឹងថា លោកបានចូលបម្រើការជាយោធា អស់រយៈពេល ៤ឆ្នាំមកហើយ ដោយប្រចាំការនៅជួរមុខ ទិសថ្មដូន ជិតប្រាសាទតាក្របី និងប្រាសាទតាមាន់ ខេត្តឧត្ដរមានជ័យ ។ ក្នុងការងារជាយោធានេះ លោកទទួលបានប្រាក់ខែ ១លាន ៣០ម៉ឺនរៀល ហើយជីវភាពជួបការលំបាក ព្រោះក្រៅពីមិនទាន់មានផ្ទះរស់នៅខ្លួនឯង គឺរស់នៅជាមួយឪពុកម្ដាយក្មេក គ្រួសាររបស់លោកពឹងតែលើប្រាក់ខែទាហានរបស់លោក មួយមុខគត់ ហើយជារៀងរាល់ខែ លោកត្រូវបែងចែកប្រាក់ខែនេះ សម្រាប់បង់ធនាគារ ទិញទឹកដោះគោ ឲ្យកូនបៅ និងទុកសម្រាប់ចាយវាយខ្លួនឯងបន្តិចបន្តួចប៉ុណ្ណោះ ។ ជាក់ស្ដែង នៅថ្ងៃទី២២ ខែសីហា ឆ្នាំ២០២៥ ពេលបើកប្រាក់ខែ បាន១លាន ៣០ ម៉ឺនរៀលនោះ លោកបានដកខ្លះ នៅសល់១លាន ៦ម៉ឺនរៀល ទុកឲ្យប្រពន្ធ តែមិនទាន់បានឲ្យប្រពន្ធផង ស៊យជ្រុះបាត់លុយនោះអស់ ហើយបើទោះបីលោកប្រកាសជូនដំណឹងរកអ្នករើសបាន តាំងពីថ្ងៃបាត់នោះ មកដល់ពេលនេះ នៅតែរកមិនឃើញ ដែលធ្វើឲ្យលោកគិតថា ប្រហែលអ្នកដែលរើសបាន មិនមានចិត្តអាណិត ប្រគល់លុយប្រាក់ខែនេះ ដល់ទាហានកម្សត់ដូចរូបលោកនេះវិញទេ ទើបស្ងាត់ឈឹងបែបនេះ ខណៈគ្រួសារលោកកំពុងជួបប្រទះការខ្វះខាត ត្រូវការលុយទិញទឹកដោះគោឲ្យកូនបៅ ។
យុទ្ធជន សេង ខានីន បានរៀបរាប់ពីដើមហេតុនាំឲ្យជ្រុះបាត់លុយប្រាក់ខែ ជាង១លានរៀលនេះថា “បាទ! ក្នុងនាមជាកងទ័ព ខ្ញុំពុំសូវមានពេលបានទៅជួបប្រពន្ធកូនទេ គឺបានសុំមេទៅមួយភ្លែតៗ នៅពេលបើកប្រាក់ខែរួច ត្រូវយកប្រាក់ខែនេះ ទៅឲ្យប្រពន្ធ ចាត់ចែងចំណាយ ។ ចំណុចនេះហើយ ទើបផ្ដើមឲ្យខ្ញុំជ្រុះបាត់លុយ គឺមុនដំបូងឡើយ ពេលបើកលុយហើយ ខ្ញុំដាក់លុយដែលទុកឲ្យប្រពន្ធទិញទឹកដោះគោកូន (១លាន ៦ម៉ឺនរៀល) ហ្នឹង នៅក្នុងហោប៉ៅអាវ ទាហានខាងឆ្វេង ហើយលុយដែលខ្ញុំដកទុកខ្លួនឯង ៦-៧ម៉ឺនរៀល និងលុយរាយ ក្រដាស ១ពាន់រៀល ខ្ញុំដាក់នៅហោប៉ៅ ខាងស្ដាំ ។ បន្ទាប់មក ខ្ញុំក៏ជិះម៉ូតូទៅផ្ទះ ប៉ុន្តែពេលទៅដល់ផ្ទះ ខ្ញុំក៏មកវិញភ្លាម អត់ទាន់បានឲ្យលុយនេះទៅប្រពន្ធទេ ដោយសារតែគាត់អត់បាននៅផ្ទះ ហើយខ្ញុំក៏ប្រញាប់មកប្រចាំការជួរមុខវិញ ព្រោះមិនអាចចោលកន្លែងសមរភូមិយូរបានទេ ។ ពេលមកដល់ពាក់កណ្ដាលផ្លូវ ខ្ញុំបានឈប់ម៉ូតូ ចុះទិញទឹកផឹក ដោយដកលុយដែលទុកឲ្យប្រពន្ធនោះ ឲ្យថ្លៃទឹកគេ តែដោយអត់មានរាយ ខ្ញុំក៏យកទៅដាក់ក្នុងហោប៉ៅខោវិញ ដោយមិនដាក់នៅក្នុងហោប៉ៅអាវទៀតទេ ។ រីឯលុយរាយ សម្រាប់ទុកខ្លួនឯងនៅហៅប៉ៅអាវខាងស្ដាំហ្នឹង ខ្ញុំក៏ដកឲ្យថ្លៃទឹកគេតែម្ដងទៅ ។ ពេលឲ្យថ្លៃទឹកគេរួច ខ្ញុំក៏ឡើងជិះម៉ូតូ មកដល់ចំណុចផ្លូវភូមិរនាមធំ ក៏នឹកឃើញភ្លេចអាវក្រោះក្នុងផ្ទះ ក៏ដកទូរស័ព្ទពីក្នុងហោប៉ៅខោ ក៏មិនឃើញលុយដែលដាក់នៅក្នុងហោប៉ៅខោនោះ មិនដឹងថា ជ្រុះនៅកន្លែងដែលខ្ញុំដកលុយទិញទឹកនោះ ឬជ្រុះនៅតាមផ្លូវ» ។
លោកសេង ខានីន បន្តថា “ក្នុងរយៈពេលដែលបាត់លុយ ៥ថ្ងៃនេះ ខ្ញុំខំផុសរកតាមហ្វេសប៊ុក ដែរ តែយើងមិនដឹងថា គេរើសបាន គេអត់ឲ្យ គ្រាន់តែយើងស្ដាយ ដោយសារតែប្រាក់ខែយើង ខំបើកមក មិនបានចាយ មិនបានឲ្យប្រពន្ធ ។ ប៉ុន្តែក្រោយដឹងថា ខ្ញុំជ្រុះបាត់លុយប្រាក់ខែ មានបងប្អូនជនរួមជាតិខ្លះ ជួយឧបត្ថម្ភខ្លះដែរ ម្នាក់៥ម៉ឺនរៀល ១០ម៉ឺនរៀល គ្រាន់ឲ្យយកទៅដោះទ័លបានមួយគ្រាសិន ប៉ុន្តែមិនគ្រប់ទេ នៅតែខ្វះលុយទិញទឹកដោះឲ្យកូន ព្រោះកូនទាំង២ នៅតែបៅទឹកដោះគោ ។ យ៉ាងណា ក្នុងនាមជាវីរកងទ័ព ទោះបីលុយ ក៏បាត់ទៅ ធ្វើម៉េចបើបានជាបាត់ទៅហើយ តែនៅតែមានទឹកចិត្តមោះមុតការពារទឹកដី មិនចោលជួរមុខទេ ដោយមិនបានចាប់អារម្មណ៍រឿងលុយ មួយរយភាគរយទេ ។ ប៉ុន្តែខ្ញុំនៅតែអំពាវនាវថា បើមានអ្នករើសបាន ហើយនឹកអាណិតខ្ញុំជាកងទ័ព និងអាណិតដល់កូនៗខ្ញុំ គ្មានទឹកដោះគោបៅ សូមយកមកប្រគល់ជូនខ្ញុំវិញផង ហើយបើមានអ្នកជួយឧបត្ថម្ភ ក៏ខ្ញុំរីករាយនឹងទទួលយក និងជូនពរពួកគាត់ ឲ្យជួបតែសេចក្ដីសុខ សំណាងល្អ“ ៕ កុលបុត្រ
