ប្រធានាធិបតីសហរដ្ឋអាមេរិក លោកចូបៃដិន បានយល់ព្រមកាលពីថ្ងៃច័ន្ទជាមួយសមភាគីហ្វីលីពីនលោក ហ្វើឌីណាន់ ម៉ាកូស ដើម្បីបង្កើត ទម្រង់កិច្ចសហប្រតិបត្តិការត្រីភាគីជាមួយប្រទេសជប៉ុន ប្រឆាំងសកម្មភាពយោធាឈ្លានពានរបស់ចិននៅជុំវិញកោះតៃវ៉ាន់ និងផ្នែកផ្សេងទៀតនៃតំបន់ឥណ្ឌូប៉ាស៊ីហ្វិក។ជំនួបរបស់លោកបៃដិនជាមួយលោក ម៉ាកូសកើតឡើងចំពេលមានភាពតានតឹងកើនឡើងនៅក្នុងសមុទ្រចិនខាងត្បូង រវាងប្រទេសកោះមួយនេះ និងប្រទេសចិន ដែលទាមទារដែនទឹកដែលមានជម្លោះជាទឹកដីរបស់ខ្លួន។នៅពេលដែលសហរដ្ឋអាមេរិកបង្កើនកិច្ចខិតខំប្រឹងប្រែងដើម្បីរារាំងប្រទេសចិនពីការពង្រីកឥទ្ធិពលរបស់ខ្លួននៅក្នុងតំបន់នោះប្រធានាធិបតីបានយល់ព្រមលើគោលការណ៍ណែនាំការពារទ្វេភាគីថ្មីដែលមានគោលបំណងធ្វើឱ្យប្រសើរឡើងនូវអន្តរប្រតិបត្តិការនៃកងកម្លាំងរបស់ពួកគេនៅក្នុងដែនគោក សមុទ្រ ដែនអាកាស និងអ៊ីនធឺណែត បន្ទាប់ពីកិច្ចប្រជុំនៅ។ នេះបើតាមមន្ត្រីសេតវិមាន។
លោកបៃដិនបានប្រាប់លោកម៉ាកូសថាសហរដ្ឋអាមេរិក មិនមានការប្រែប្រួលទេនៅក្នុងការប្តេជ្ញាចិត្តរបស់ខ្លួនចំពោះការការពារប្រទេសហ្វីលីពីន រួមទាំងនៅក្នុងសមុទ្រចិនខាងត្បូង ដែលប្រទេសចិនបានធ្វើការទាមទារទឹកដីដ៏ធំទូលាយ ហើយនឹងបន្តគាំទ្រដល់ទំនើបកម្មនៃយោធារបស់ប្រទេសអាស៊ីអាគ្នេយ៍មួយនេះ។ជាមួយគ្នានេះដែរសេតវិមានបានប្រកាសពីផែនការផ្ទេរយន្តហោះដឹកជញ្ជូន C-130 ចំនួនបីគ្រឿង និងនាវាល្បាតបន្ថែមទៅកាន់ប្រទេសហ្វីលីពីន ដើម្បីជួយប្រទេសនេះធ្វើឱ្យប្រសើរឡើងនូវសមត្ថភាពនាវាចរណ៍ ។
ក្នុងអំឡុងពេលនៃកិច្ចប្រជុំដែលបើកចំហចំពោះសារព័ត៌មាន លោកម៉ាកូសបាននិយាយថា ប្រទេសហ្វីលីពីនអាចនឹងប្រឈមមុខជាមួយនឹង ស្ថានភាពភូមិសាស្ត្រនយោបាយដ៏ស្មុគស្មាញបំផុតនៅក្នុងពិភពលោកនាពេលនេះដោយសារតែបញ្ហាប្រឈមថ្មីៗ។
លោកបានបន្ថែមថាវាគ្រាន់តែជារឿងធម្មតាប៉ុណ្ណោះ សម្រាប់ទីក្រុងម៉ានីលក្នុងការស្វែងរកការពង្រឹងទំនាក់ទំនងជាមួយទីក្រុងវ៉ាស៊ីនតោនដែលជាដៃគូសន្ធិសញ្ញាសន្តិសុខតែមួយគត់របស់ខ្លួនដោយលើកឡើងពីភាពតានតឹងបន្តនៅសមុទ្រចិនខាងត្បូង។
នៅក្នុងសេចក្តីថ្លែងការណ៍រួមមួយដែលបានចេញផ្សាយបន្ទាប់ពីកិច្ចប្រជុំរបស់លោកបៃដិននិងម៉ាកូសបានសង្កត់ធ្ងន់ថា ការប្តេជ្ញាចិត្តឥតងាករេរបស់ពួកគេចំពោះសេរីភាពនៃការធ្វើនាវាចរណ៍ និងការហោះហើរលើសមុទ្រចិនខាងត្បូង និងសារៈសំខាន់នៃការគោរពសិទ្ធិអធិបតេយ្យភាពរបស់រដ្ឋនៅក្នុងតំបន់សេដ្ឋកិច្ចផ្តាច់មុខរបស់ពួកគេស្របតាមច្បាប់អន្តរជាតិ៕