ខណៈដែលលោកឧកញ៉ាម៉ុង ឫទ្ធី បានចំណាយពេលជាច្រើនឆ្នាំ និងថវិកាអស់រាប់លានដុល្លារ នោះ នៅថ្ងៃនេះ លោកឧកញ៉ាបានបញ្ចេញសារបញ្ជាក់ថា រយៈពេល២៤ឆ្នាំ ចំណាយទុនជាង១០០លានដុល្លារ មិនទាន់ទទួលបានប្រាក់ចំណេញនោះឡើយទេ ប៉ុន្តែបែរជាបានសំរាមទៅវិញ។
នៅថ្ងៃទី១៧ ខែមីនា ឆ្នាំ២០២១ លោកឧកញ៉ា ម៉ុង ឫទ្ធី បានបង្ហោះសារថា “ក្រុមហ៊ុន ម៉ុង ឫទ្ធី វិនិយោគទុនដំណាំដូងប្រេងកម្ពុជា បានចាប់បដិសន្ធិឡើង ក្រោមការដឹកនាំដ៏ឈ្លាសវៃរបស់ប្រមុខដឹកនាំរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលសម្តេចបានអញ្ជើញជាអធិបតីក្នុងពិធីបើកសម្ពោធដាំដើមដូងប្រេងជាលើកដំបូង កាលពីថ្ងៃទី២៣ ខែមេសា ឆ្នាំ១៩៩៧ នៅលើទឹកដីខេត្តព្រះសីហនុ បើគិតរហូតមកដល់ពេលនេះ មានអាយុកាល២៤ឆ្នាំបានកន្លងផុតទៅហើយ ក្នុងនោះក្រុមហ៊ុនបានចំណាយទុនវិនិយោគអស់ប្រមាណជាជាង១០០លានដុល្លារអាមេរិកទៅហើយ កុំថាឡើយទទួលបានប្រាក់ចំណេញ សូម្បីតែដើមទុនវិនិយោគក៏នៅមិនទាន់បានទទួលមកវិញផង ក្នុងរយៈពេល២៤ឆ្នាំនេះ ខ្ញុំត្រូវឆ្លងកាត់សង្គ្រាម ផ្គររន្ទះ រហូតមកដល់ពេលនេះក៏នៅតែមានជនខិលខូចមករំលោភយកដីធ្លីថែមទៀតផង។
លោកឧកញ៉ា បន្តថា “ជាលទ្ធផលរយៈពេល២៤នេះ ទទួលបានតែសំរាមដែលត្រូវបោសសំអាត នៅក្រោយពេលក្រុមអ្នកទេសចរណ៍ ក្រោយពេលពួកគេកន្ទេលត្រឡប់ទៅវិញ។ ឆ្លងកាត់រយៈពេល២៤ឆ្នាំនេះ ជនបរទេសដែលបាននាំគ្នាមកបោះទុនវិនិយោគរួមគ្នាជាមួយនិងខ្ញុំ និងអ្នកបច្ចេកទេសមួយចំនួនផង បានបាត់បង់ជីវិតជាបណ្ដើរៗអស់ទៅហើយ ចំណែកឯអ្នកនៅរស់រានមានជីវិតក៏មានវ័យកាន់តែចំណាស់អស់ទៅហើយ ដែលបើតាមការប៉ាន់ស្មានមើលទៅរហូតដល់ថ្ងៃអវសាននៃជីវិតរបស់ខ្ញុំ និងដៃគូរបរទេសទៅទៀត ក៏នៅតែមិនទទួលបានប្រាក់ថ្លៃដើមទុនវិនិយោគនេះមកវិញដែល ប្រហែលជាអាចទទួលបានតែកាដូសំរាមដែលក្រុមអ្នកទេសចរណ៍ អសីលធម៌មុខដដែលៗ តែងតែយកមកបោះចោលនេះតែប៉ុណ្ណឹងទេ មើលទៅ ។
លោកឧកញ៉ាបញ្ជាក់ថា “បើបងប្អូនពិតជាមានបេះដូងមែន សូមមើលរូបភាពនេះ ហើយពិចារណាផងទៅ ថាតើប្រមុខរាជរដ្ឋាភិបាលយើងលោកខិតខំប្រឹងប្រែងលះបង់កម្លាំងកាយចិត្ត ប្រាជ្ញា ស្មារតី ជាមួយនិងអ្វីៗគ្រប់បែបយ៉ាង រួមជាមួយរូបខ្ញុំ ព្រមទាំងក្រុមអ្នកវិនិយោគទុនបរទេស បុគ្គលិក កម្មករ ប្រជាពលរដ្ឋ និងអាជ្ញាធរគ្រប់លំដាប់ថ្នាក់ ទេីបទទួលបានសមិទ្ធផលដ៏ថ្មីត្រចះត្រចង់មួយនេះ ។
បើបងប្អូនមិនស្រឡាញ់ខ្លួន និងក្រុមគ្រួសារខ្លួនឯងទេ គួរតែទុកកិត្តិយសឲ្យជាតិខ្មែរ ថ្នាក់ដឹកនាំខ្មែរ រួមជាមួយនិងប្រជាពលរដ្ឋខ្មែរយើងផង។ (ត្រូវសន្យាខ្លួនឯងថា ចាប់ពីថ្ងែនេះតទៅ ឈប់ចោលសំរាមនៅក្នុងចម្ការដូងប្រេងទៀតហើយ)។
យ៉ាងណា កន្លងមក គេតែងតែឃើញលោកឧកញ៉ា ម៉ុង ឫទ្ធី តែងតែបង្ហោះសារដាស់តឿនៅភ្ញៀវទេសចរមួយចំនួន ដែលបានចូលទៅញាំអីក្នុងចម្ការដូងប្រេងរបស់លោកឧកញ៉ា សូមមានអនាម័យ វេចខ្ចប់សំរាមដែលបានបរិភោគហើយ ដាក់ត្រឹមត្រូវ៕
