ខេត្តបន្ទាយមានជ័យ : បុរសវ័យចំណាស់ម្នាក់ជាយោធិនចូលនិវត្តន៍បានជិះទូកដាក់មង នៅតាមស្ទឹងសិរីសោភ័ណ ស្រាប់តែត្រូវក្មេងស្ទាវដែលផឹកសុីស្រវឹងក៏បាននាំគ្នារៀនបើកម៉ូតូទឹក ស្រាប់តែជ្រុលបុកចំជនរងគ្រោះ បណ្តាលឲ្យក្រឡាប់ទូកធ្លាក់ចូលទៅក្នុងទឹកលិចបាត់ ភ្លាមនោះជនបង្កបានព្យាយាមគេចខ្លួន តែត្រូវសមត្ថកិច្ចចាប់ខ្លួនបាន។
ករណីគ្រោះថ្នាក់ចរាចរណ៍ផ្លូវទឹកនេះ បានកើតមានការភ្ញាក់ផ្អើលឡើង នៅវេលាម៉ោង៦និង០០នាទី ល្ងាចថ្ងៃទី២០ ខែតុលា ឆ្នាំ២០១៩ ស្ថិតនៅភូមិ៣ សង្កាត់ព្រះពន្លា ក្រុងសិរីសោភ័ណ ។
ជនរងគ្រោះមានឈ្មោះ ឡាំង សាវិន ភេទប្រុស អាយុ៥២ឆ្នាំ ជាយោធិនចូលនិវត្តន៍ រស់នៅភូមិកើតហេតុខាងលើ ចំណែកជនសង្ស័យមានឈ្មោះ លី ចិន្តា ភេទប្រុស អាយុ៣៦ឆ្នាំ ជាជាងផ្សារដែក រស់នៅភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
លោកវរសេនីយ៍ឯក ស៊ីឌី អធិការស្រុកសេរីសោភណ្ឌ បានឲ្យដឹងទៀតថា នៅមុនពេលកើតហេតុនោះ មានយុវជន១ក្រុមនាំគ្នាអង្គុយផឹកនៅមាត់ស្ទឹង តាំងពីម៉ោង៤ល្ងាច រួចហើយបាននាំគ្នាចុះទៅរៀនបើកម៉ូតូទឹកនៅម្តុំស្ពានថ្មថ្មី ។ ពេលកំពុងរៀនបើកម៉ូតូទឹកនោះ ដោយមិនចាប់អារម្មណ៍ផងនោះ ស្រាប់តែបានបុកចំជនរងគ្រោះដែលកំពុងជិះទូកដាក់មងពេញទំហឹងបណ្តាលឲ្យធ្លាក់ចូលទៅក្នុងទឹកស្ទឹងបាត់តែម្តង ហើយជិះគេចខ្លួនបាត់ស្រមោល។
លោកវរសេនីយ៍ឯក ស៊ីឌី បានបន្ថែមថា ក្រោយពេលទទួលដំណឹងភ្លាម លោកបានដឹកនាំកម្លាំងនគរបាលក្រុងសិរីសោភ័ណ១ក្រុម ចំណែកលោកវរសេនីយ៍ត្រីយ៉ាន់ សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណ ដឹកនាំកម្លាំងអាវុធហត្ថ១ក្រុម ចុះធ្វើអន្តរាគមន៍ដេញចាប់ជនបង្ក ហើយក្រោយមកបានជួយរុករកសាកសពជនរងគ្រោះ រហូតដល់ម៉ោង១០យប់ តែរកមិនទាន់ឃើញទៀត។
មកដល់ព្រឹកនេះ កម្លាំងសមត្ថកិច្ចបានប្រើប្រាស់ទូក អួន និងសម្ភារៈជាច្រើនទៀត ដើម្បីបន្តការរកសពជនរងគ្រោះទៀត ប៉ុន្តែនៅតែរកមិនទាន់ឃើញ។
បច្ចុប្បន្ន កម្លាំងសមត្ថកិច្ចបានធ្វើការសាកសួរជនបង្ក ដើម្បីរៀបចំសំណុំរឿងបញ្ជូនទៅតុលាការ ដើម្បីចាត់ទៅតាមផ្លូវច្បាប់៕
