ភ្នំពេញ ៖ បន្ទាប់ពីរដ្ឋាភិបាលសម្រេចចេញក្រដាសប្រាក់១មុឺន៥ពាន់រៀល ដើម្បីអបអរគម្រប់ខួប១៥ព្រះវស្សានៃការយាងគ្រងព្រះបរមសិរីរាជ្យសម្បត្តិនៃព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត នាពេលខាងមុខ ដែលក្នុងក្រដាសប្រាក់ថ្មីនេះមានរូបវិមានឈ្នះឈ្នះផងនោះ ស្រាប់តែមានក្រុមមួយក្តាប់តូចបានធ្វើការរិះគន់ ប៉ុន្តែនៅពេលនេះនាយឧត្តមសេនីយ៍ ណឹម សុវត្ថិ បានចាត់ទុកក្រុមទាំងនោះជាល្អងធូលីប៉ុណ្ណោះ។
ថ្លែងក្នុងសន្និសីទ នាព្រឹកថ្ងៃទី៤ ខែតុលា ឆ្នាំ២០១៩នេះ នាយឧត្តមសេនីយ៍ ណឹម សុវត្ថិ អគ្គនាយកនៃអគ្គនាយកដ្ឋាននយោបាយ និងកិច្ចការបរទេសក្រសួងការពារជាតិ និងជាប្រធានក្រុមការងារសាងសង់វិមានឈ្នះ ឈ្នះ បានចាត់ទុកក្រុមអ្នករិះគន់រូបវិមានឈ្នះឈ្នះ ក្នុងក្រដាសប្រាក់១ម៉ឺន៥ពាន់រៀលថា ជាល្អងធូលី ដែលបានខ្យល់បក់មួយភ្លែតហើយបាត់ទៅវិញ គ្មានស្រមោល ខណៈវិមានឈ្នះ ឈ្នះត្រូវបានចាត់ទុកជានិមិត្តសញ្ញាដ៏ធំមួយសម្រាប់ប្រទេសជាតិ និងជាសំណង់ដែលតំណាងឲ្យសន្តិភាពហើយនោះ។
ឯកឧត្តមណឹម សុវត្ថិ បានបន្ថែមថា វាគ្មានអ្វីចំឡែកនោះទេដែលក្រុមអ្នកប្រឆាំងបានធ្វើការរិះគន់នូវសមិទ្ធដែលរាជរដ្ឋាភិបាលខិតខំធ្វើនិងកសាងមក ហើយក្រុមទាំងនោះក៏ពួកគេកំពុងសប្បាយនិងដកដង្ហើមនៅក្រោមម្លប់សន្តិភាពនាពេលបច្ចុប្បន្ននេះដែរ។
យ៉ាងណាក៏ដោយឯកឧត្តមណឹម សុវត្ថិ បានថ្លែងចាត់ទុកថា ការរិះគន់ទាំងនោះគឺវាប្រៀបបានដូចជាល្អងធូលីដ៏តូចមួយដែលខ្យល់បក់មួយភ្លែតយ៉ាងដូច្នេះដែរ ហើយគ្មានហេតុផលណាមួយដែលត្រូវប្រកាន់ពួកអ្នកទាំងនោះឡើយ។
គួរបញ្ជាក់ផងដែរថា នៅថ្ងៃទី២៩ ខែតុលា ឆ្នាំ២០១៩ ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានឡើងគ្រងរាជ្យសម្បត្តិបានចំនួន១៥ព្រះវស្សាហើយ៕