បន្ទាប់ពីជ្រើសរើសបាននូវសហគ្រិនឆ្នើមទាំង១១រូប តាមរយៈការវាយតម្លៃយ៉ាងម៉ត់ចត់ពីគណៈកម្មការដាក់ពិន្ទុរួចមក សភាយុវពាណិជ្ជករអន្តរជាតិកម្ពុជា (JCI) សាខាមេគង្គ និងសមាគមសហគ្រិនវ័យក្មេងកម្ពុជា (YEAC) បានសហការរៀបចំព្រឹត្តិការណ៍រាត្រីស្រមោលសរដ៏ពិសេស គឺ “ពិធីប្រគល់ពានរង្វាន់ដល់ម្ចាស់ពានរង្វាន់ទាំង៥រូប” នៃពានរង្វាន់សហគ្រិនវ័យក្មេងកម្ពុជា ឆ្នាំ២០១៩ (Cambodian Young Entrepreneur Awards 2019)។
ក្នុងការប្រព្រឹត្តទៅនេះដែរបានធ្វើឡើងនៅសណ្ឋាគារសូហ្វីតែលភោគិត្រាភ្នំពេញ នាថ្ងៃទី២០ ខែកក្កដា ឆ្នាំ២០១៩ នៅវេលាម៉ោង៥ល្ងាច រហូតទៅដល់ម៉ោង១០យប់ ដែលមានការចូលរួមជាអធិបតីភាពពីឯកឧត្តមសុន គន្ធរ ទេសរដ្ឋមន្រ្តីរដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានសភាមុខរបរនិងមីក្រូសហគ្រាសកម្ពុជា ព្រមទាំងភ្ញៀវកិត្តិយសជាច្រើនទៀត ហើយក៏មានការចូលរួមពីសំណាក់សហគ្រិនរាប់រយនាក់ផងដែរ ដើម្បីស្វែងរកម្ចាស់ជ័យលាភី ដែលទទួលបាននូវពានរង្វាន់ទាំង៥រូប ក្នុងពិធីពានរង្វាន់សហគ្រិនវ័យក្មេងកម្ពុជាឆ្នាំ២០១៩។
ឯកឧត្តមសុន គន្ធរ បានមានប្រសាសន៍ជូនដល់អ្នកចូលរួមទាំងអស់ដែរថា “សហគ្រិនជោគជ័យ ប្រកបដោយប្រត្យក្សារម្មណ៍ ត្រូវមានសមត្ថភាពពិសេស៣ គឺសមត្ថភាពប្រាជ្ញា សមត្ថភាពផ្លូវចិត្ត និងសមត្ថភាពផ្លូវកាយ”។ សម្រាប់ឆ្នាំ២០១៩នេះ ក្រៅតែពីការប្រកាសលទ្ធផល និងប្រគល់ពានរង្វាន់ដល់ម្ចាស់ជ័យលាភីទាំង៥រូបនេះ កម្មវិធីពានរង្វាន់សហគ្រិនវ័យ ក្មេងបានពាំនាំនូវកម្មវិធីប្លែកៗ និងពិសេសមួយចំនួនទៀតរួមមានផ្ទាំងទស្សនីយភាពនៃសិល្បៈរបាំខ្មែរ ព្រមទាំងការតាំងពិព័រណ៌បង្ហាញរបស់សហគ្រិនឆ្នើម ដែលបានចូលរួមប្រកួត ក្នុងកម្មវិធីពានរង្វាន់សហគ្រិនវ័យក្មេងកម្ពុជាផងដែរ។
សូមជម្រាបជូនថា កម្មវិធីប្រកួតប្រជែងពានរង្វាន់សហគ្រិនវ័យក្មេងកម្ពុជា (CYEA) នឹងជ្រើសរើសសហគ្រិនឆ្នើមចំនួន៥រូបដើម្បីមានឱកាសក្លាយទៅជាម្ចាស់ពានរង្វាន់សហគ្រិនវ័យក្មេង ប្រចាំឆ្នាំ២០១៩ ដែលក្នុងនោះដែលមានដូចជា ពានរង្វាន់សហគ្រិនឆ្នើមប្រចាំឆ្នាំ លោកឧកញ៉ា នួន រិទ្ធី, Khmer Foundation Appraisal Co.,Ltd ពានរង្វាន់សង្គម លោកឆន គឹមពិជេជ្ឋ,Mekong Valley Co., Ltd ពានរង្វាន់សហគ្រិនឆ្នើមបច្ចេកវិទ្យា លោកប៊ុន ផាក, Camazoon Co., Ltd ពានរង្វាន់សហគ្រិនឆ្នើមស្រ្តី អ្នកនាង ឃុន ពិសី, Career Finder ពានរង្វាន់សហគ្រិនឆ្នើមអាជីវកម្មចាប់ផ្ដើមថ្មី លោកឡុង សុភ័ក្រ្ត, Sopheaklong Supplier Co., Ltd សម្រាប់សហគ្រិនទាំង៥រូប គឺជាបេក្ខជនដែលមានសមត្ថភាពក្នុងការវិវត្តន៍មុខជំនួញឲ្យមានការរីកចម្រើនលឿននៅក្នុងរយៈពេលខ្លី មានភាពច្នៃប្រឌិតខ្ពស់ក្នុងការប្រកបអាជីវកម្ម ព្រមទាំងមានការវាយតម្លៃយ៉ាងសុក្រឹតជាទីបំផុត ពីខាងគណៈកម្មការដោយផ្អែក ទៅលើលក្ខខ័ណ្ឌនៃការប្រកួតផងដែរ។
គួរបញ្ជាក់ផងដែរថា នេះគឺជាលើកទី៥ហើយដែលសភាយុវពាណិជ្ជករអន្តរជាតិកម្ពុជា (JCI) សាខាមេគង្គនិងសមាគមសហគ្រិនវ័យក្មេងកម្ពុជា (YEAC) បានរៀបចំការប្រកួតប្រជែងពានរង្វាន់សហគ្រិនវ័យក្មេងកម្ពុជានេះឡើង ហើយកម្មវិធីនេះធ្វើឡើងក្នុងគោលបំណងទទួលស្គាល់និងលើកទឹកចិត្តដល់បណ្តាសហគ្រិនវ័យក្មេងកម្ពុជា ឲ្យមានឱកាសចូលរួមបង្ហាញសមត្ថភាព ចែករំលែកនូវជោគជ័យជាលក្ខណៈថ្នាក់ជាតិផងដែរ៕
